Willie Drowned in Yarrow by Anonymous

Down in yon garden sweet and gay
Where bonnie grows the lily,
I heard a fair maid sighing say,
"My wish be wi' sweet Willie!

"Willie's rare, and Willie's fair,
And Willie's wondrous bonnie;
And Willie hecht to marry me,
Gin e'er he married ony.

"O gentle wind, that bloweth south,
From where my Love repaireth,
Convey a kiss frae his dear mouth,
And tell me how he fareth!

"O tell sweet Willie to come doun
And hear the mavis singing,
And see the birds on ilka bush
And leaves around them hinging.

"The lav'rock there, wi' her white breast
And gentle throat sae narrow;
There's sport eneuch for gentlemen
On Leader haughs and Yarrow.

"O Leader haughs are wide and braid,
And Yarrow haughs are bonnie;
There Willie hecht to marry me,
If e'er he married ony.

"But Willie's gone, whom I thought on,
And does not hear me weeping;
Draws many a tear frae true love's e'e
When other maids are sleeping.

"Yestreen I made my bed fu' braid,
The night I'll mak' it narrow,
For a' the livelang winter night
I lie twined o' my marrow.

"O came ye by yon waterside?
Pou'd you the rose or lily?
Or came you by yon meadow green,
Or saw you my sweet Willie?"

She sought him up, she sought him down,
She sought him braid and narrow;
Syne, in the cleaving of a craig,
She found him drown'd in Yarrow!